**កំពូលតារាហូលីវូដ Angelina Jolie៖ «បេះដូងខ្ញុំនៅតែរួមរស់ជាមួយពលរដ្ឋខ្មែរ ដែលរងគ្រោះដោយជម្លោះព្រំដែន»**

* **ប្រភពរូបភាព (Image Credit):** REUTERS / Kim Hong-Ji

**កម្ពុជា៖** តារាសម្តែងហូលីវូដ និងជាសកម្មជនមនុស្សធម៌ដ៏ល្បីល្បាញ អ្នកស្រី Angelina Jolie បានសម្តែងក្តីព្រួយបារម្ភយ៉ាងខ្លាំងចំពោះប្រជាពលរដ្ឋកម្ពុជាជិត ៣ម៉ឺននាក់ ដែលនៅបន្តជម្លៀសខ្លួនដោយសារជម្លោះព្រំដែនកាលពីឆ្នាំមុន ដោយអ្នកស្រីបានបញ្ជាក់ថា បេះដូងរបស់អ្នកស្រីនៅតែរួមរស់ជាមួយក្រុមគ្រួសារដែលរងផលប៉ះពាល់ ខណៈដែលពួកគេកំពុងរង់ចាំថ្ងៃដែលអាចត្រឡប់ទៅកាន់លំនៅឋានវិញដោយសុវត្ថិភាព។ នៅក្នុងសេចក្តីថ្លែងការណ៍មួយដែលបានបង្ហោះនៅលើគណនី Instagram ផ្លូវការរបស់អ្នកស្រីនាថ្ងៃនេះ អ្នកស្រី Jolie បានរំលឹកខួបនៃជម្លោះនេះ ដោយលើកឡើងថា វាបាន «បំផ្លាញសុវត្ថិភាព និងស្ថិរភាពរបស់មនុស្សជាច្រើន»។ អ្នកស្រីបានសរសេររៀបរាប់យ៉ាងដូច្នេះថា៖ «កាលពីមួយឆ្នាំមុន ជម្លោះបានផ្ទុះឡើងនៅតាមបណ្តោយព្រំដែនកម្ពុជា ដែលបានបំផ្លាញសុវត្ថិភាព និងស្ថិរភាពរបស់មនុស្សជាច្រើន។ ពេលនេះ មនុស្សជិត ៣ម៉ឺននាក់ នៅតែបន្តជម្លៀសខ្លួនក្នុងស្រុក និងមិនទាន់អាចត្រឡប់ទៅផ្ទះវិញបានឡើយ»។ អ្នកស្រី Jolie បានបន្ថែមថា ប្រទេសកម្ពុជាតែងតែជាទីកន្លែងដ៏ពិសេសមួយនៅក្នុងជីវិតរបស់អ្នកស្រី និងក្រុមគ្រួសារ ដោយកត់សម្គាល់ថា ទីនេះគឺជាស្រុកកំណើតរបស់កូនប្រុសច្បងរបស់អ្នកស្រី គឺ Maddox។ «កម្ពុជា តែងតែជាប្រទេសដ៏ពិសេសមួយសម្រាប់គ្រួសារខ្ញុំ និងរូបខ្ញុំផ្ទាល់។ ទីនេះជាស្រុកកំណើតរបស់កូនប្រុសខ្ញុំ ផ្ទះរបស់យើងគឺនៅទីនេះ ហើយអស់រយៈពេលជាង ២០ ឆ្នាំមកហើយ ដែលយើងបានធ្វើការជាមួយក្រុមការងារដែលដឹកនាំដោយប្រជាជនមូលដ្ឋានផ្ទាល់ លើការងារអភិរក្ស និងការអភិវឌ្ឍសហគមន៍»។ អ្នកស្រីបានគូសបញ្ជាក់ថា មូលនិធិ Maddox ដែលតែងតែគាំទ្រដល់គំនិតផ្តួចផ្តើមការអភិរក្ស និងការអភិវឌ្ឍសហគមន៍នៅកម្ពុជា មានទីស្នាក់ការកណ្តាលស្ថិតនៅក្នុងតំបន់ព្រំដែន ទីដែលជម្លោះទើបនឹងបានកើតឡើងនោះឯង។ អ្នកស្រីបានឱ្យដឹងទៀតថា អ្នកស្រីបានបង្កើតមិត្តភាពយ៉ាងជិតស្និទ្ធជាមួយប្រជាជនក្នុងតំបន់ និងសមាជិកនៃមូលនិធិ ក្នុងអំឡុងពេលធ្វើការរួមគ្នាដើម្បីបោសសម្អាតគ្រាប់មីន និងអភិវឌ្ឍតំបន់នោះ។ រំលឹកដល់ពេលដែលការប្រយុទ្ធគ្នាបានផ្ទុះឡើង អ្នកស្រីបានបញ្ជាក់ថា មូលនិធិត្រូវបានបង្ខំឱ្យជម្លៀសបុគ្គលិក និងក្រុមគ្រួសាររបស់ពួកគេ ដោយរៀបរាប់ពីបទពិសោធន៍នោះថាជា «ការរំលឹកដ៏ឈឺចាប់មួយអំពីថាតើជម្លោះអាចត្រឡប់មកវិញបានលឿនកម្រិតណា»។ ទោះបីជាយ៉ាងណាក៏ដោយ អ្នកស្រីបានសម្តែងការដឹងគុណដែលមូលនិធិបានចាប់ផ្តើមការងារអភិរក្ស និងគាំទ្រសហគមន៍ឡើងវិញ ប៉ុន្តែផលវិបាកផ្នែកមនុស្សធម៌នៃជម្លោះនេះនៅតែជាប្រធានបទនៃក្តីបារម្ភយ៉ាងខ្លាំង។ អ្នកស្រីបានសរសេរបន្តថា៖ «ខ្ញុំស្រឡាញ់ប្រទេសមួយនេះ និងប្រជាជនដែលមានភាពរឹងមាំ និងកក់ក្តៅ។ ទោះបីជាយើងមានសេចក្តីត្រេកអរ ដែលបានបន្តការងារការពារធម្មជាតិ និងគាំទ្រដល់សុខភាព ព្រមទាំងជីវភាពរស់នៅរបស់សហគមន៍ឡើងវិញក៏ពិតមែន ប៉ុន្តែបេះដូងរបស់ខ្ញុំគឺនៅជាមួយអ្នករាល់គ្នា ដែលនៅតែរង់ចាំចាំថ្ងៃត្រឡប់ទៅផ្ទះវិញ»។ គួរបញ្ជាក់ផងដែរថា អ្នកស្រី Angelina Jolie មានទំនាក់ទំនងយ៉ាងជិតស្និទ្ធជាមួយប្រទេសកម្ពុជា ចាប់តាំងពីអ្នកស្រីបានទទួលយកកូនប្រុសច្បងឈ្មោះ Maddox មកចិញ្ចឹមក្នុងឆ្នាំ២០០២។ តាមរយៈមូលនិធិ Maddox និងគំនិតផ្តួចផ្តើមផ្សេងៗទៀត អ្នកស្រីបានគាំទ្រដល់កិច្ចខិតខំប្រឹងប្រែងរយៈពេលវែង ក្នុងការបោសសម្អាតគ្រាប់មីន ការអភិរក្សបរិស្ថាន ការអប់រំ ការថែទាំសុខភាព និងការអភិវឌ្ឍសហគមន៍ប្រកបដោយចីរភាពនៅកម្ពុជា។ --- * **ប្រភពព័ត៌មាន (Source):** គណនី Instagram ផ្លូវការរបស់ Angelina Jolie (@angelinajolie)