រឿង គ្រូបង្រៀនស្រុកស្រែ | អុឹម ថុក

រឿង គ្រូបង្រៀនស្រុកស្រែ | អុឹម ថុក ១. ទិដ្ឋភាពទូទៅ និងប្រវត្តិនៃការតាក់តែង ប្រភពរឿង៖ រឿងនេះត្រូវបានដកស្រង់ចេញពីបទពិសោធន៍ និងដំណើរការនៃការតស៊ូនយោបាយជាក់ស្ដែង របស់ក្រុមគ្រូបង្រៀនអ្នកស្នេហាជាតិ នៅតំបន់ព្រៃទទឹង ខេត្តកំពង់ចាម។ ប្រភេទអក្សរសិល្ប៍៖ ជាប្រលោមលោកទំនើបបែបមនោគមវិជ្ជាសង្គម និងនយោបាយ ដោយសារផ្ទៃរឿងទាំងមូលមានទំនាក់ទំនងយ៉ាងជិតស្និទ្ធទៅនឹងចលនាតស៊ូនយោបាយក្នុងសង្គម។ ចលនាអក្សរសិល្ប៍៖ ស្ថិតក្នុងចលនា «ខេមរនិយម» ព្រោះខ្លឹមសាររឿងបានឆ្លុះបញ្ចាំងពីទស្សនៈ ផ្នត់គំនិត ទំនៀមទម្លាប់ និងរបៀបរបបរស់នៅរបស់សង្គមខ្មែរសុទ្ធសាធ។ ឥទ្ធិពល៖ ទទួលឥទ្ធិពលពីចរន្ត «សង្គមនិយម» តាមរយៈការបញ្ជ្រាបនូវឧត្តមគតិ និងទស្សនៈជឿនលឿន ដើម្បីផ្លាស់ប្តូរសង្គម។

អ្នកនិពន្ធ និងកាលបរិច្ឆេទ៖ តាក់តែងឡើងដោយលោក អ៊ឹម ថុក ក្នុងឆ្នាំ ១៩៥៧។ ២. សាច់រឿងសង្ខេប សាច់រឿងបានបើកឆាកជាមួយនឹងតួអង្គ បងហម ដែលជាកសិករ អតីតទាហានជើងក្រហម និងជាមន្ត្រីតូចតាចនៅក្នុងក្រសួងសាធារណការ។ គាត់ត្រូវបានកម្លាំងប៉ូលិសតាមប្រមាញ់ចាប់ខ្លួន ដោយចោទប្រកាន់ថាជាមេខ្លោងក្នុងការគៀងគរ និងបំផុសបំផុលមហាជនឱ្យក្រោកឈរយល់ដឹងពីលទ្ធិប្រជាធិបតេយ្យ។ ដោយយល់ឃើញថាស្ថានការណ៍មិនស្រួល ព្រមទាំងទទួលបានការយល់ព្រមពីមិត្តរួមចលនា បងហមក៏បានសម្រេចចិត្តរត់គេចខ្លួនមួយរយៈ។ ក្នុងរាត្រីនៃការរត់គេចខ្លួននោះ បងហមបានជួបសន្ទនាយ៉ាងក្បោះក្បាយជាមួយ អន្ទិតឡឹម និង អាចារ្យសែម។ ពួកគេបានលើកយកអំពើជិះជាន់ឃោរឃៅរបស់ពួកនាយទុនមកជជែកវែកញែក ព្រមទាំងបានពិភាក្សាគ្នាពីមាគ៌ាឆ្ពោះទៅរកការរៀបចំទម្រង់សង្គមឡើងវិញ ផ្អែកលើទស្សនៈជឿនលឿនថ្មី។ ទន្ទឹមនឹងនោះ សកម្មភាពនៃការបំផុសចលនាមហាជននេះ ក៏បានបណ្ដាលឱ្យ គ្រូម៉ៅ ត្រូវជាប់ពន្ធនាគារអស់រយៈពេល ២ខែ។ ចំណែកឯគ្រូបង្រៀនដែលមាននិន្នាការស្រដៀងគ្នាផ្សេងទៀត ដូចជា គ្រូចន្ទ គ្រូថាន់ និង គ្រូវ៉ាត ក៏ត្រូវបានរងការតាមដាន និងត្រូវក្រសួងអប់រំបញ្ជាឱ្យផ្លាស់ប្តូរទីកន្លែងបង្រៀនចេញពីភូមិម៉ាស៊ីនស្រូវ។ ទោះជាយ៉ាងណាក៏ដោយ វិធានការគាបសង្កត់របស់ក្រសួង ដែលប៉ុនប៉ងផ្តាច់ទំនាក់ទំនង និងបង្អាក់ចលនាមហាជននេះ មិនទទួលបានជោគជ័យឡើយ ព្រោះគ្រូបង្រៀនដែលផ្លាស់មកថ្មី ក៏នៅតែមានទស្សនៈ និងជំហរសង្គមដូចគ្រូមុនៗដដែល។

ពេលវេលាចេះតែកន្លងផុតទៅ ស្ថានការណ៍នៅក្នុងស្រុកព្រៃទទឹងក៏ចាប់ផ្តើមធូរស្រាល។ អ្នកដែលធ្លាប់ជាប់ពន្ធនាគារ និងអ្នកជាប់ពិរុទ្ធទាំងឡាយ ក៏ត្រូវបានដោះលែងឱ្យមានសេរីភាពឡើងវិញ។ លុះចូលដល់រដូវវិស្សមកាលក្នុងខែចេត្រ គ្រូចន្ទ គ្រូថាន់ និង គ្រូវ៉ាត បាននាំគ្នាត្រឡប់មកលេងភូមិម៉ាស៊ីនស្រូវវិញដោយក្ដីសោមនស្សរីករាយ។ នៅទីនោះ ពួកគេនៅតែបន្តជួបជុំពិភាក្សាគ្នាអំពីគោលគំនិត និងស្វែងរកមធ្យោបាយថ្មីៗ ដើម្បីរៀបចំសង្គមឡើងវិញ ក្រោមទស្សនៈ និងជំហរជឿនលឿនយ៉ាងមុតមាំដដែល។ ៣. ប្រធានរឿង និងមូលបញ្ហា ប្រធានរឿង៖ ផ្តោតសំខាន់ទៅលើ «ការតស៊ូ» របស់វីរជនស្នេហាជាតិ ដើម្បីទាមទារសិទ្ធិសេរីភាព និងស្វែងរកលទ្ធិប្រជាធិបតេយ្យពិតប្រាកដជូនប្រជាជាតិ។ មូលបញ្ហា៖ ការប្រទាញប្រទង់គ្នា រវាងសកម្មភាពតស៊ូបំផុសចលនាមហាជន ជាមួយនឹងវិធានការបង្ក្រាប និងការប៉ុនប៉ងរារាំងកាត់ផ្ដាច់ខ្សែរយៈចលនាពីសំណាក់អ្នកមានអំណាច។ ៤. តម្លៃអប់រំដែលទទួលបានពីរឿង

ស្មារតីសាមគ្គីភាព៖ បង្រៀនឱ្យប្រជាជនចេះរួបរួមគ្នា ចេះជួយទុក្ខធុរៈ និងជ្រោមជ្រែងគ្នាក្នុងកាលៈទេសៈលំបាក។ ការយល់ដឹងពីសង្គម៖ ជំរុញឱ្យប្រជាជនទទួលបានការរៀនសូត្រ ស្គាល់ពីតម្លៃនៃលទ្ធិប្រជាធិបតេយ្យ និងអាចរំដោះខ្លួនចេញពីអំពើពុករលួយ។ ការប្រយុទ្ធប្រឆាំង៖ លើកទឹកចិត្តឱ្យហ៊ានក្រោកឈរប្រឆាំងនឹងភាពអយុត្តិធម៌គ្រប់ទម្រង់នៅក្នុងសង្គម។ ឆន្ទៈ និងឧត្តមគតិ៖ ដាស់តឿនឱ្យមានសេចក្តីអំណត់អត់ធន់ មានឆន្ទៈមុតស្រួចក្នុងការការពារជាតិ ការពារសិទ្ធិសេរីភាព ព្រមទាំងប្រកាន់ខ្ជាប់នូវឧត្តមគតិស្នេហាសន្តិភាព មនុស្សជាតិ និងសេរីភាព។ តម្លៃស្ត្រីក្នុងសង្គម៖ រំលេចឱ្យឃើញពីការយល់ដឹងរបស់ស្ត្រីទាក់ទងនឹងបញ្ហាស្រុកទេស និងបានបង្ហាញពីការចូលរួមចំណែក (វិភាគទាន) យ៉ាងសំខាន់របស់នារី នៅក្នុងចលនារំដោះជាតិ។